Framundan í Gerðarsafni

24.5.2017

Innra, með og á milli   
3. júní - 20. ágúst 2017

 

Lokað er í Gerðarsafni vegna sýningarskipta en sýningin Innra, með og á milli opnar laugardaginn 3. júní. Garðskálinn og fræðslurýmið Stúdíó Gerðar eru opin á neðri hæð safnsins.

Gerði Helgadóttur (1928-1975) er boðið að taka þátt í samfelldu samtali listamannanna Ragnheiðar Gestsdóttur (IS), Theresu Himmer (DK/IS) og Emily Weiner (US) á sýningunni Innra, með og á milli. Samtal þeirra og könnun á ólínulegri túlkun á stað og tíma, tungumáli og þýðingum tók á sig áþreifanlega mynd haustið 2015 þegar þær umbreyttu rannsóknum sínum í sýninguna Speak Nearby í Soloway í Brooklyn, New York. Listamennirnir kynnstust við MFA nám í School of Visual Arts í New York árið 2011.

Sýningunni í Gerðarsafni er ætlað að fanga vangaveltur um samhengi, tíma og gerð sögunnar þar sem listamennirnir fjórir standa jafnfætis þvert á stað og tíma – einhvers staðar inn á milli. 

Sýningarstjóri er Malene Dam, sem starfar í Kaupmannahöfn. Í starfi sínu hefur hún fengist við skrif um listir og menningu og sinnt sýningarstjórn sem gjarnan tengjast málefnum líðandi stundar, með áherslu á hinsegin og femínískan lestur og sögu, túlkun og erjur.