Fjölskylduleiðsögn og síðasta sýningarhelgi

6.4.2016

Verið velkomin í fjölskylduleiðsögn í Gerðarsafni á laugardaginn, 9. apríl kl. 13. Við förum saman í rannsóknarleiðangur í gegnum safneignarsýninguna Blint stefnumót. Á leiðangrinum munum við prufa óvæntar leiðir til að horfa á list og sjá hvernig hægt er að lesa listaverk á mismunandi hátt. Við munum teikna í anda listaverkanna og gera tilraunir með ólík form sem við finnum í verkunum.

Leiðsögnin markar síðustu sýningarhelgi safneignarsýningarinnar Blint stefnumót, sem stendur til sunnudagsins 10. apríl. Blint stefnumót birtir óvænt kynni verka úr safneign Gerðarsafns. Verkin sjálf spanna heila öld í íslenskri listasögu og á sýningunni er leitast við að skoða tengsl þeirra og um leið að huga að því hvernig safneign af þessu tagi verður til á löngum tíma.


Leiðsögnin er hluti af fjölskyldustundum í menningarhúsunum í Hamraborginni. Alla laugardaga í vor er boðið upp á viðburði fyrir fjölskylduna ýmist í Gerðarsafni, Bókasafni Kópavogs, Náttúrufræðistofu Kópavogs eða í Salnum. Um er að ræða listsmiðjur, upplestur, tónleika og fleira fyrir börn og unglinga og hefjast viðburðirnir alltaf kl. 13. 

Samhliða leiðsögninni er opið í fræðslurýminu Stúdíó Gerðar þar sem má gera eigin veggmynd í anda mósaík og klippimynda Gerðar Helgadóttur. Garðskálinn er opinn á neðri hæð safnsins og á matseðlinum eru brunch eggjabaka, súpa, smurbrauð og kökur.

Gerðarsafn verður lokað vegna uppsetningar á næstu sýningu dagana 12.-16. apríl. Útskriftarsýning meistaranema í hönnun og myndlist við Listaháskóla Íslands opnar laugardaginn 16. apríl.





Fylgstu með okkur


Opnunartími

Þriðjudaga - föstudaga 11.00 - 17.00
Laugardaga - sunnudaga 11.00 - 17.00

Lokað á mánudögum

Aðgangseyrir er 1000 kr.

Námsmenn 500 kr. Frítt fyrir börn og ungmenni yngri en 18 ára,
aldraða, öryrkja og félaga í SÍM, ICOM, FÍMK, FÍSOS gegn framvísun skírteinis.

Frítt á miðvikudögum