Listrænn stjórnandi

23.10.2014

Kristín Dagmar Jóhannesdóttir hefur verið ráðin listrænn stjórnandi Gerðarsafns, listasafns Kópavogs. Hún var valin úr hópi 40 umsækjenda og talin hæfust til að gegna starfinu. Starfið var auglýst laust til umsóknar í lok ágúst og er ráðið í það til fimm ára í senn. Kristín Dagmar mun m.a. móta listræna stefnu Gerðarsafns, skipuleggja sýningar þess og faglegt starf, bera ábyrgð á  listaverkasafni Kópavogsbæjar og annast kaup á listaverkum.

Kristín Dagmar hlaut M.A. gráðu í samtímalistfræðum frá Edinburgh College of Art og B.A í listfræði frá Háskóla Íslands. Hún hefur fjölbreytta reynslu af sýningarstjórnun og stjórnun listrænna verkefna en einnig hefur hún stýrt fræðslustarfi hjá Listasafni Reykjavíkur og Listasafni Íslands. 

Meðal sýninga má nefna „Ég hef aldrei séð fígúratíft rafmagn“ í Listasafni Reykjavíkur - Ásmundarsafni og „Að elta fólk og drekka mjólk“ sem sett var upp í Hafnarborg. Hún var listrænn stjórnandi Sequences Art Festival í Reykjavík og er stundakennari við Listaháskóla Íslands. Nýverið ritstýrði hún bók um ljósmyndaverk Sigurðar Guðmundssonar, Dancing Horizon, sem gefin var út af Crymo­geu fyrr í mánuðinum.

Gerðarsafn var opnað árið 1994 og stendur á Borgarholtinu ásamt Salnum, Náttúrufræðistofu Kópavogs, Bókasafni Kópavogs og Tónlistarsafni Íslands. Skammt undan er Héraðsskjalasafn Kópavogs. Starfsemi þessara húsa tilheyrir Listhúsi Kópavogsbæjar en þar er nú unnið að stefnumótun fyrir menningarstarf bæjarins í heild.

Kristín Dagmar er boðin velkomin til starfa hjá Kópavogsbæ.






Fylgstu með okkur


Opnunartími

Þriðjudaga - föstudaga 11.00 - 17.00
Laugardaga - sunnudaga 11.00 - 17.00

Lokað á mánudögum

Aðgangseyrir er 1000 kr.

Námsmenn 500 kr. Frítt fyrir börn og ungmenni yngri en 18 ára,
aldraða, öryrkja og félaga í SÍM, ICOM, FÍMK, FÍSOS gegn framvísun skírteinis.

Frítt á miðvikudögum