Næstu sýningar

Hughrif - Hólmfríður Árnadóttir

Hólmfríður Árnadóttir

Listakonan Hólmfríður Árnadóttir opnaði sýninguna Hughrif laugardaginn 15. nóvember  í Gerðarsafni. Á sýningunni eru annarsvegar sýnd pappírsverk frá fyrrihluta ferils listakonunnar, unnin með blandaðri eigin tækni og öll með vatnsuppleysanlegum vönduðum ljósekta litum. Hinsvegar nýrri textílverk, ýmist handofin úr íslenskri ull eða silki, með einskeftu eða vaðmáli. Verk Hólmfríðar eru einföld og hrein en án allrar upphafningar eða alvarleika. Leikurinn liggur öllu heldur í skapandi afstöðu hennar til hins hversdagslega umhverfis. 

Hólmfríður lauk kennaraprófi frá Handíða- og myndlistaskólanum og vann að menntamálum allan sinn feril. Einnig hélt hún áfram að sækja sér frekari menntun og sótti námskeið og lagði stund á starfsnám hér heima, í Danmörku og Bretlandi þar sem hún var félagi í British Crafts Centre (sem nú heitir Contemporary Applied Arts) og hafði náin tengsl við Royal College of Art. Snemma tók hún þátt í mótun námsefnis enda vildi hún kynna aðrar hugmyndir en hefðin bauð. Hún lauk loks störfum sem prófessor við Kennaraháskóla Íslands og var sæmd fálkaorðu árið 2009 fyrir framlag sitt til listkennslu í íslensku skólakerfi. Hólmfríður hefur ávallt fengist við sína eigin sköpun samhliða kennslustörfum, haldið sýningar og tekið þátt í fjölmörgum samsýningum, aðallega utanlands. Listsköpun hennar, kennsla og rannsóknir verða vart aðskildar. 

Í tilefni sýningarinnar er einnig gefin út bók sem dregur saman ágrip af verkum Hólmfríðar Árnadóttur þar sem listunnendur geta áttað sig betur á framlagi hennar til íslenskrar myndlistar. Inngang ritar Jón Proppé.



Fylgstu með okkur


Opnunartími

Þriðjudaga - föstudaga 11.00 - 17.00
Laugardaga - sunnudaga 11.00 - 17.00

Lokað á mánudögum

Aðgangseyrir er 1000 kr.

Námsmenn 500 kr. Frítt fyrir börn og ungmenni yngri en 18 ára,
aldraða, öryrkja og félaga í SÍM, ICOM, FÍMK, FÍSOS gegn framvísun skírteinis.

Frítt á miðvikudögum