Valgerður Briem

1914 - 2002

Í marsmánuði 2009 færðu börn Valgerðar Briem myndlistarkonu, Páll Bergsson, Valgerður Bergsdóttur og Þorsteinn Bergsson Gerðarsafni að gjöf teikningasafn móður sinnar. Um listsköpun og verk Valgerðar Briem ritaði Guðbjörg Kristjánsdóttir forstöðumaður í sýningarskrána Þverskurður eftirfarandi:

Valgerður Briem (1914-2002) var annálaður myndlistarkennari. Skissubækur og óteljandi teikningar sem hún vann í tengslum við myndlistarkennslu sína bera þess merki að hún hefur verið síhugsandi um hvernig miðla mætti munsturgerð og hönnun til nemenda. Hvert einstakt munstur er þróað með þrotlausri vinnu í ótal skissum uns lokaútgáfa fæst og hugmyndir sem kviknuðu í vinnuferli skráðar. Þannig urðu til heilu sjónabækurnar. Ein hefur að geyma háþróaðar og frumlegar leturgerðir, sem sumar hverjar eru sprottnar úr íslenskri hefð, aðrar innblásnar af list samtímans. Valgerður vann einnig ótal skissur með vefnaði í huga og sótti efnivið í gamla, íslenska muni á Þjóðminjasafni Íslands. Hið mikla teiknisafn Valgerðar er fjársjóður fegurðar. Slík var teiknisnilli hennar og hugmyndaauðgi.

Á haustmánuðum 2006 var haldin yfirlitssýning á verkum Valgerðar Briem í efri sölum Gerðarsafns. Í framhaldi af henni gáfu börn Valgerðar 10 myndir í syrpunni Landlit og myndröðina Fuglar og hafa nú eins og að ofan greinir gefið öll verkin sem voru í hennar eigu þegar hún lést. Hér er um ómetanlegt safn að ræða sem gefur góða mynd af listsköpun þessarar mikilhæfu listakonu. Síðan Valgerður Bergsdóttir kom til starfa í Gerðarsafni vann hún við að ljósmynda og tölvuskrá verk móður sinnar. Komið hefur í ljós að í þessari höfðinglegu gjöf eru rösklega 1640 teikningar af ýmsum toga sem unnar eru með margvíslegum teikniaðferðum. Valgerður Briem var frábær teiknari og listamaður. Þetta mikla teikningasafn er einstakt í íslenskri myndlistarsögu og enginn vafi á að það verður óþrjótandi uppspretta fyrir sýningarhald í Gerðarsafni á komandi árum. Þessi höfðinglega gjöf eykur safneignina til muna og eflir Gerðarsafn á alla lund.


Fylgstu með okkur


Opnunartími

Þriðjudaga - föstudaga 11.00 - 17.00
Laugardaga - sunnudaga 11.00 - 17.00

Lokað á mánudögum

Aðgangseyrir er 1000 kr.

Námsmenn 500 kr. Frítt fyrir börn og ungmenni yngri en 18 ára,
aldraða, öryrkja og félaga í SÍM, ICOM, FÍMK, FÍSOS gegn framvísun skírteinis.

Frítt á miðvikudögum