 |
||||
|
Gerðarsafn er framsækið listasafn með megináherslu á nútíma- og samtímalist í glæsilegri byggingu á besta stað í Kópavogi. Safnið er reist í minningu Gerðar Helgadóttur myndhöggvara. Í Gerðarsafni eru á hverju ári haldnar um 20 sýningar af fjölbreyttu tagi, innlendar sem erlendar. Þrír sýningarsalir eru í safninu, tveir á efri hæð með ofanlýsingu en á neðri hæð er fjölnotasýningarsalur ásamt bjartri og notalegri kaffistofu. Ókeypis aðgangur er að Gerðarsafni nema á erlendar sérsýningar.
Opið alla daga nema mánudaga kl. 11-17
YFIRSTANDANDI SÝNING:
Gerðarlegt í Gerðarsafni. Verk Gerðar Helgadóttur. Nýir og eldri munir í safnbúð. Á safnanótt 12. febrúar verður opnuð á neðri hæð sýningin Til þess er leikurinn Gerður, sýning barna úr Myndlistarskóla Kópavogs. Á sýningunni Gerðarlegt í Gerðarsafni eru verk Gerðar Helgadóttur og munir, sem hönnuðir hafa unnið með hliðsjón af verkum Gerðar á síðastliðnum áratug. Minjagripagerð þessi hófst fyrir tíu árum og var þá nýsköpunarverkefni á sviði lista. Markmið verkefnisins er að leggja rækt við verk og minningu Gerðar Helgadóttur. Einnig má líta á minjagripagerðina sem menningarverkefni þar sem hönnuðir samtímans nota áratuga gömul listaverk Gerðar í eigin sköpun og verk hennar eru á þann hátt færð til samtímans. Við hönnun minjagripa hafa myndhöfundar allt frá upphafi verkefnisins leitað fanga í verk Gerðar frá ólíkum tímaskeiðum. Á það jafnt við um klippimyndir og verk úr járni frá upphafi 6. áratugarins og bronsverk og glerglugga frá 7. áratugnum. Einnig hefur egypska tímabilið um miðjan 7. áratuginn verið mikil uppspretta hugmynda fyrir hönnuðina.
Margir af helstu hönnuðum landsins hafa tekið þátt í þessari nýsköpun. Kristín Ísleifsdóttir hafði í upphafi eftirlit með gerð verka ásamt því að vera hönnuður. Aðrir þátttakendur voru Kristín S. Garðarsdóttir, Ingiríður Óðinsdóttir, Ólöf Birna Garðarsdóttir, Tinna Gunnarsdóttir og Þorbergur Halldórsson, Helga Björnsson, Katrín Þorvaldsdóttir, Ragna Fróðadóttir og Sigrún Ó. Einarsdóttir.
Nú í ár voru fengnir fleiri hönnuðir til liðs við verkefnið til að auka breidd í gerð minjagripanna. Hönnuðirnir eru þau Kristín Þóra Guðbjartsdóttir, Helgi Mar Hallgrímsson, María Björk Stefánsdóttir og Steinunn Jónsdóttir. Á sýningunni verður sérstök áhersla lögð á skissur þeirra og hugmyndir. Umsjón og markaðsstjórn hefur Sveinbjörg Gunnarsdóttir haft með höndum.
Á safnanótt 12. febrúar verður opnuð sýningin Til þess er leikurinn Gerður í neðri sölum safnsins, sýning á nemendavinnu frá öllum barna -og unglingadeildum Myndlistarskóla Kópavogs. Í kennslu hafa verk Gerðar Helgadóttur verið grunnur að leik og hugmyndavinnu barnanna og nemendur hafa að vild haft verkin til hliðsjónar eða spunnið sjálfstætt í vinnuferlinu.
Sýningin Til þess er leikurinn Gerður er sjálfstæð viðbót við sýninguna Gerðarlegt í Gerðarsafni.
Sýningarnar verða opnar alla virka daga klukkan 11-17, lokað er á mánudögum. Sýningunum lýkur 28. febrúar.
|
|||
| ENGLISH |  |
|||